【摸著咖啡杯底的說話】
終於有返少少時間執吓暑假影落嘅相。
嗚啊～阿人夫真識嘆！坐喺意大利西南部嘅Capri 對住一望無際嘅 第勒尼安海Tyrrhenian Sea 撚咖啡！☕☕
唔好睇我哋飛嚟飛去好寫意，其實每次放假，或叫放生，都係用哂喺大家平日覺得好容易去到或做到的事情。
例如銀行、入境處、診所、領事館、郵局、診所、銀行、領事館、診所……然後必要時再loop多次。
原因好簡單，因為我哋位處呢個連埃及三線城市都不如嘅地方，除咗英泥沙石，以上嘅地點，全部都要起碼2.5 - 3小時車程到達開羅先有，就算有都未必幫你做到你想做的事情。
所以剛過去嘅夏天悠長假期，揾一個冇銀行冇政府部門嘅地方可去散散心，亦好難得可以靜靜地兩公婆有個心靈溝通。嗱嗱嗱，千祈唔好話平時起身返工或放工返嚟滾水碌腳煮飯洗埋衫，然後用最後一口氣躝上床之前嗰幾句叫溝通啊化~我只會列入為指令，簡單問答，甚至...頂撞🙈
婚姻的好與壞，在乎溝通與關懷。
人生苦短，有時真係好好思索一吓終日疲於奔命究竟為乜？為開飯？為養家？為隻貓？香港人，個個都搏條老命去日做夜做，偏偏忽略咗生命裡最重要嗰個。錢，係換唔返時間去善待枕邊人。
我同意佬對住藍天碧海喺度研究：假若你嘅人生只剩下倒數十秒鐘，你會選擇點樣過？
「有你陪住我，望住呢個海嘆埋人生最後一杯espresso, 我就無憾了。」
有你在我面前，告訴我你餘下最寶貴的十秒都交託給我，我亦無憾。
《珍惜每一個十秒，珍惜當下……》
Photo Credit : 意佬老婆
#人生的最後十秒
#珍惜當下
#抱緊眼前人
#意大利的夏天
#Capri卡普里島
#TyrrhenianSea第勒尼安海
Search